محمد ذیشان
لاہور: (اے پی) آئی سی سی چیمپئنز ٹرافی کے چوتھے میچ میں آسٹریلیا نے انگلینڈ کو 5 وکٹوں سے شکست دے دی۔ لاہور کے قذافی اسٹیڈیم میں کھیلے گئے اس سنسنی خیز مقابلے میں آسٹریلیا نے 352 رنز کا ہدف 48ویں اوور میں 5 وکٹوں کے نقصان پر حاصل کر لیا۔
آسٹریلیا کی جانب سے وکٹ کیپر بیٹر جوش انگلس نے شاندار بیٹنگ کا مظاہرہ کیا اور 86 گیندوں پر 120 رنز کی ناقابلِ شکست اننگز کھیل کر اپنی ٹیم کی فتح میں کلیدی کردار ادا کیا۔ ان کے ساتھ گلین میکسویل 32 رنز بنا کر ناٹ آؤٹ رہے۔
دیگر آسٹریلوی بلے بازوں میں ایلکس کیرے 69، میتھیو شارٹ 63، مارنس لبوشین 47، ٹریوس ہیڈ 6 اور کپتان اسٹیو اسمتھ 5 رنز بنا کر آؤٹ ہوئے۔ انگلینڈ کے بولرز کی جانب سے عادل راشد، لیام لونگسٹن، مارک ووڈ، جوفرا آرچر اور برائڈن کارس نے ایک، ایک وکٹ حاصل کی۔
اس سے قبل آسٹریلیا کی دعوت پر پہلے بیٹنگ کرتے ہوئے انگلینڈ نے مقررہ 50 اوورز میں 8 وکٹوں کے نقصان پر 351 رنز اسکور کیے۔ اوپنر بین ڈکٹ نے شاندار بلے بازی کا مظاہرہ کرتے ہوئے 165 رنز کی یادگار اننگز کھیلی اور ٹیم کی جانب سے نمایاں رہے۔
دیگر انگلش بیٹرز میں جو روٹ 68، کپتان جوس بٹلر 23، جیمی اسمتھ 15، لیام لونگسٹن 14، فل سالٹ 10، برائڈن کارس 8 اور ہیری بروک 3 رنز بنا کر آؤٹ ہوئے۔ جوفرا آرچر 21 اور عادل راشد 1 رن بنا کر ناٹ آؤٹ رہے۔
آسٹریلیا کے بولرز کی جانب سے بین ڈوارہوس نے شاندار بولنگ کا مظاہرہ کرتے ہوئے 3 کھلاڑیوں کو پویلین کی راہ دکھائی، جبکہ ایڈم زیمپا اور مارنس لبوشین نے 2، 2 اور گلین میکسویل نے 1 وکٹ حاصل کی۔
اس فتح کے بعد آسٹریلیا نے چیمپئنز ٹرافی میں اپنے امکانات کو مزید مضبوط کر لیا ہے، جبکہ انگلینڈ کے لیے اگلے میچز میں کامیابی ضروری ہو گئی ہے۔
دونوں ٹیموں کے درمیان یہ مقابلہ انتہائی سنسنی خیز رہا اور شائقین کرکٹ کو ایک یادگار میچ دیکھنے کو ملا۔
English