پاکستان کو دوسرے ٹی ٹوئنٹی میں شکست، جنوبی افریقا نے سیریز اپنے نام کرلی

پاکستان کو دوسرے ٹی ٹوئنٹی میں شکست، جنوبی افریقا نے سیریز اپنے نام کرلی
رپورٹ: محمد ذیشان

جنوبی افریقا نے پاکستان کو دوسرے ٹی ٹوئنٹی میچ میں 7 وکٹوں سے شکست دے کر تین میچز کی سیریز 0-2 سے اپنے نام کرلی۔ سنچورین میں کھیلے گئے میچ میں پاکستان کے کپتان محمد رضوان نے ٹاس جیت کر پہلے بیٹنگ کا فیصلہ کیا۔

پاکستان کی بیٹنگ میں اوپنر صائم ایوب نے شاندار کھیل کا مظاہرہ کیا اور 57 گیندوں پر 98 رنز کی ناقابل شکست اننگز کھیلی۔ ان کی اننگز میں 11 چوکے اور 5 چھکے شامل تھے۔ دیگر بلے بازوں میں بابر اعظم نے 31 اور عرفان خان نے 30 رنز بنائے، تاہم ٹیم 206 رنز پر محدود رہی۔

جنوبی افریقا کی بولنگ میں گیلیم اور بارٹ مین نمایاں رہے، جنہوں نے دو، دو وکٹیں حاصل کیں۔ پاکستان کا اسکور بڑا ہونے کے باوجود جنوبی افریقا کے بلے بازوں کے لیے چیلنج ثابت نہ ہوسکا۔

جنوبی افریقا کی اننگز میں ریزا ہینڈرکس نے عمدہ بیٹنگ کرتے ہوئے 63 گیندوں پر 117 رنز بنائے، جس میں 10 چھکے اور 7 چوکے شامل تھے۔ ان کے ساتھ روسی ون ڈر ڈوسن نے 66 رنز کی ناقابل شکست اننگز کھیلی، جس کی بدولت جنوبی افریقا نے ہدف 19.3 اوورز میں حاصل کرلیا۔

پاکستانی بولرز خاص کارکردگی نہ دکھا سکے۔ جہانداد خان نے 2 وکٹیں حاصل کیں، جبکہ عباس آفریدی نے ایک وکٹ لی۔ شاہین آفریدی اور حارث رؤف دونوں مہنگی بولنگ کے باوجود کوئی وکٹ نہ لے سکے اور شدید دباؤ میں نظر آئے۔

پاکستان کی ٹیم نے بیٹنگ میں بہتر کارکردگی کا مظاہرہ کیا، لیکن بولنگ لائن اپ جنوبی افریقا کی جارحانہ بلے بازی کے سامنے بے بس دکھائی دی۔ میچ کے دوران فیلڈنگ میں بھی کئی مواقع ضائع کیے گئے، جس سے ٹیم کے اعتماد پر اثر پڑا۔

سیریز میں شکست کے بعد پاکستان کے لیے تیسرے اور آخری میچ میں اپنی عزت بچانا چیلنج بن گیا ہے۔ کپتان محمد رضوان نے میچ کے بعد اعتراف کیا کہ ٹیم کو بولنگ اور فیلڈنگ میں بہتری کی ضرورت ہے۔

پاکستان ٹیم اب تیسرے میچ میں نئی حکمت عملی کے ساتھ میدان میں اترے گی تاکہ شکستوں کے سلسلے کو توڑ کر فتح کے ساتھ سیریز کا اختتام کرسکے۔